Singapore Jinghpaw Hkristan Kanawn Mazum Hpung (SKCF) a Out Going Bible Study Lamang

May 1, May Day holiday, shani an-hte Singapore Jinghpaw Hkristan kanawn mazum hpung (SKCF) hku na Out Going Bible Study lamang hpe Singapore Chinese Garden hta Jinghpaw hte kaga hpu nau Myu sha yawng marai 50 jan hte galaw lai wa sai hku re.

Jahpawt maga 10:00am kaw na lamang hpe hpang wa ai hku re. Kyu Hpyi let Karai Kasang kaw up nawng let Chyum Ga ni hpe daw lahkawng garan let sharin hkam la sai hku re. Daw langai hku na jahpawt maga na chyum laika hpe sharin gut ai hpang shani shat hpe kahpu kanau Dashi Naw Tawng hku na Shat Jam (Dan Pauk) hte daw ai hku re.

Daw lahkawng hpe shana maga 01:45pm kaw na bai hpang wa let 02:30pm daram hta ngut kre lu sai hku re. Chyum laika sharin ai lamang hpe gaw kaga aMyu sha hpunau ni shanglawm ai majaw Myen ga hku sharin lai wa sai.

Chyum laika sharin ai lamang gut ai hpang Singapore Jinghpaw Kanawn Mazum komiti hku na woi awn let du sa ai hpu nau ni hpe shachyen shaga ai hte gin sup hpa ni hte rau yawng hpe woi awn kanawn mazum lai wa sai.

Gin sup ai lamang ni hta kalang mi mung nmu ga ai baw gin sup hkrang hpe mung mu lu ai hku re. La kasha marai 5 tup lata la nna num ni n-ten hkyeng chya ai baw hpe shawng na wa hpe ladi hta e chya ya n htawm langai hpang langai lata n lawm ai sha ladi kaw chya shalai ai gin sup hpa hpe mu lu ai hku re. Hpang jahtum na wa a ladi kaw n-ten hkyeng kade naw ngam ai hpe yu let gau law ngam ai ni dang ai hpe mu lu ai. Ndai zawn gin sup hpa hpe myit shapraw lu ai SKCF a kanawn mazum komiti ni hpe grai shakawn ai hku re.

Gin sup hpa ni yawng gaw marai langai hkrai n rai, yawng myit hkrum let gin sup ra ai gin sup lamang ni hkrai rai nga ai. Du sa ai hpu nau ni yawng mung mani sum sai rai grai pyaw let myit shabran, n-gun awoi la lu sai hku re. Hkying 06:00pm kaw yawng hkyu hpyi let gin chyum dat sai hku re.

Dai hpang shana daw 6:30pm hpang de gaw Slg. David hte Jan. Jadoi yan a kasha Esther a 3 ning hpring chye ju shakawn hpawng de yawng bai shakawn makawng hte wu wu di di rai shang lawm lai wa sai hku re.

"Esther a ntsa Karai Kasang kaw nga shaman chye ju n hpaw n ya lu la u ga ngu hkyu hpyi ya dat ai."

An-hte Singapore kaw nga ai Jinghpaw Wunpawng Myu sha ni ndai zawn kaloi mung kanawn mazum ai lam ni hpe galoi mung galaw nga ai hku re. Laban shani shagu Jinghpaw hku naw ku hpawng nga ai lam mung saw shaga shana dat ai.

Original Post hpe www.kachinroad.blogspot.com kaw na "sumla" lamang kaw yu yu ga.