NHKUM HKAWN DIN HPE UHPUNG HKU ROI RIP N'HTAWM KAM MARA ZINGRI SAT KAU AI A N'TSA NDAU SHABRA AI LAM

by **Ta Tut** Tue Aug 26, 2008 2:44 am

Amyu Shayi Hpung Ginjaw Komiti

Wunpawng Mungdan Shanglawt Amyu Shayi Hpung

Laika Masat ;- 124 / 441/ A / C.C / 08'

Ninghtoi ; - 2008 Ning, August (21) ya.

GINLAM ;- NHKUM HKAWN DIN HPE UHPUNG HKU ROI RIP N'HTAWM KAM MARA ZINGRI SAT KAU AI A N'TSA NDAU SHABRA AI LAM.

Manmaw Ginwang, N Bapa Ginwang Daw, Bum Sen Ninghtawn, Nam Sai Mare na salang Nhkum Yawng Shawng hte Jan Maran Nu Bren yan a shayi sha Nhkum Hkawn Din, asak (14) Ning, shata (1), N mawk Mare Lapran Tsang Jawng, Laika Tsang ( Cool

jawng num kasha hpe Ninghtoi – 27-7-08, bat (6) ya hta shi a kahpu hpe hkauna de n gu hte lu sha sa na matu, sa wa ai lam lapran e, HK.M.Y 437 ( N'mawk Dap ) kaw na hpyen la marai (2) gaw shayi Nhkum Hkawn Din hpe tsinggu krin di nhtawm baw hte myi man adup grawp da ai, Myi tum lahkawng maga achyaw baw ya ai, du hkraw kaw kadoi ya ai, hkra lahpa npu hte kan kaw n hkyi hte galun da ya ai, num hkrang kaw galun gadoi ya ai hte shinggyim myit tsep kawp n rawng, kam mara zingri sat da ai lam amu byin lai wa sai.

Ndai zawn zingri sat ai lam gaw hpyen la ni uhpung hku roi rip ngut nhtawm sat da ai re lam mabyin masa ni hpe shachyaw yu nna, sawn maram chye lu ai.

Lahta na mabyin a ntsa, mare na myi chyaw mu sakse salang ni a, pru tsun ai hte maren, 27.7.08 jahpawt hkying 9: 00 AM grup yin hta HK.M.Y 437 ( N'mawk Dap ) kaw na Gyi Aye Thein, woi awn ai hpung na hpyen la (2) hta nyawm ai ni gaw, amu tawt lai ai lam maram chye lu ai hte dai uhpung hta na hpyen ma Soe Tu Win hpe myi chyaw mu ai salang ni madun shapraw lu sai lam nga ai.

Ndai lam hpe anhte Wunpawng Mungdan Shanglawt Amyu Shayi Hpung kaw nna, na chying wa maroi n ni, masin nsi ai hte ninghkap ai.

Ndai zawn Wunpawng buga ginra hta Wunpawng Amyu Shayi sha ni hpe atik anang roi rip ngut nhtawm kam mara zingri sat makoi ai lam ni gaw lang hte lang rai wa sai.

Ndai zawn re ai lam ni byin ai hpe ninghkap jahkring lu na matu, seng ang ai ginra madu ni rai nga ai tinang Wunpawng Mungdan Shanglawt Hpung gaw, lit nga ai Myanmar Munghpawm Mungdan Asuya hte jahkrup nhtawm, ja ja ahkyak la ya na hte htawm hpang de dai zawn re ai lawng lam ai nbyin hkra lit la ya na matu, ra sharawng let hpyi shawn ndau shabra ga ai.

Amyu Shayi Hpung Ginjaw Komiti