Myen hte UN, ngai ram pi baw nu n rawng sam ma ai.

Ya bai masha marai 5 rim mat sai da Mykikyina kaw. Hpa majaw nga yang 'No Vote' a majaw rai na hku re da. Ngai gaw mau pi n kam mau mat sai. Myen Asuya ngu ai gaw n hkru n kaja ai lam nga yang yawng hta jan jan rai sha man chye ju lu dai ai ni rai sam ai.

Ya mung yu yu u le, Referendum hta shan hte bai dang hkyem sai. A ga Karai Kasang n kam yu na majoi dat da ai Tsa Dan ma nat, Matse labye ni rai sam ai ngu gaw e. Myit masin kata ganing ngu ai mi she rawng ai mi re n chye. Shan hte a amyu sha dai ram she si jawng, jam jau jawng nga yang pi pyaw pyaw sha re chye nga ai ni. Yawng yawng 'hpawk hte pe naw hpu hte hting ke' nga ai hpa.

Ya mung UN a garum na lu sha ni htaw ai Nbung li 2 ting hpe rim da masai da. "Tax" hte seng ai a majaw da. Nu, Wa, Hpu nau ni myit yu ga, Majoi jaw na lu sha a lu bang ai rai hpe pi "Tax" naw hta sha mayu nga ma ai. Ndai sa wa ka nu ni kaning rai she prat hpe jahtum na nga ma ai kun gaw e. Masha 1,000,000 jan a a sak hpe n gawn n sawn di ai ni hpe Karai Kasang galoi she mara jaw na kun.

Ndai Myen Asuya du ni hpa baw mai kaja ai galaw da ma ai kun le? Ya mung garum na matu Mungkan U lagaw hkyen (Red Cross) a hka li langa mi a dawt na gup mat ai da. Lam sa ai masha ni pi garum chyaw garum shan hte hpe pi bai hkye la ra ai madang de she du mat wa masai. American (USA) a hpyen n bung li langai mi hpe gaw lu sha ni htaw di shang shangun sai da. Shang wa ai shaloi she bai rim hkrum mat na matu mung tsang ra nga ga ai.

Myen Mung shara shagu nga ai Lau Ban nkau ni gaw, jam jau hkrum ai ni hpe n gu garum na nga yang mung rim wa ai hte rai ma ai da le. Hpung Kyi langai mi hpe mung shi a garum na rai ni hte hpawn rim bang kau dat sai da.

Na lu ai shi ga ni hku nga yang gaw grai myit n pyaw na zawn nga ai hkrai hkrai. Na yang salum a na pi bin wa chye ai baw she rai nga ai. Ndai Myen Asuya gaw Asuya zawn mung n rai wa nga ai. Ya mung masha sat ai hta mying kaba la ai "Tat Ma '66'" Myen dap dung 66 hpe jam jau ai ni hpe garum na matu sa dat ai da. Kanang na garum chyaw garum, Mung masha ni tam da ai lu sha ni hpe kashun sha, Lu sha n lu ai majaw pawt wa ai ni hpe gap sat kau na nga jahkrit rai she nga nga ma ai.

Dai ram jam jau yang pi grai rai sai she ngu yang Hpyen la hte bai jahkrit shama rai. N-kau mi gaw she mana mat ma ai da. Hpa majaw nga yang dum nta kaw masha kade nga yang kade si jawng mat, ti nang hkrai sha ngam mat rai ai majaw rai ma ai. N kau dum n ta ni gaw Myu she mat mat hkra n ta ting, myu ting hka e kawa sha kau rai she rai nga ma ai. Lawt wa ai ni mung ti nang hkum hpang pi masha n shadu mahkra yawn jawng nga ma ai.

Ding re ai ni hpe gaw n garum, le Yangon kaw nga nga ai "Chyan Hkai Ye" hpung ni a dum n ta masha n hkaw mi hpe a lu bang na shat loi li jaw sha ai hpe gaw, Mungkan ting hpe bau da ai zawn nga shiga hkan e bai shabra, gaya mung n chye. Mungkan ting yu nga ai hpe wa, chye nga ning len masu gwi ai hpe she shakawn mat sai.

Ga sadi ni ya nrai yang jaw, bai sha prai kau, bai jaw rai she nga nga ma ai. Ya gaw Referendum bai rai wa sai da. Dai mung a laga law, shan hte chye hkat ai ni hpe sha gaw yes bang shangun, n chye hkat ai ni hpe rai jang gaw 'No' bang jang htawng rim bang na bai nga wa. Myitkyina kaw nga ai dum n-ta law law wa gaw 'Vote' bang na shara de n ta ting pi n sa ra ai. Ding hku ning baw wa sa di n ta ting a matu bang ya pi mai ai da, Yes she bang yang gaw. 'Vote' mai sau pa ni pe dum nta de nan sa sa ya ai hku rai nga ai. Mungkan hta sawng di sai nga ai Mungdan ni pi Myen hpe yu di, "aw nan hte grau sawng ai she rai nga", nga mat na daram myit magaw ai ni. Mung masha ni a sai hpe lu, Mungdan shari hpe jahpoi rai she nga jawng nga ma ai.

UN Security Council kaw na mung, dai ram n hkru ai Asuya hpe mara n lu tam ai, nga ai majaw ngai gaw, "AW.. UN mung ngai ram pi bawnu n rawng ai ni rai sam ai, ngai wa UN kaw bung li galaw yang gaw UN a mu madu pa she n tai nga sadawng," ngu mung myit wa ai le.

Hpyen la dai ram law ai Asuya wa, hpyen la ni hpe dat na jam jau ai ni hpe garum sha ngun yang, an-hte myu sha ni mung Democracy hta Asuya hpe pi grau tsaw ra wa ai baw she re yang me, dai mung n chye sam ai law. Bawnu gaw hkyi sha bawnu rai sam ma ai. Hpa mi nga yang nga, UN mung jam jaw ai ni hpe garum lu hkra shakut ra ai. Ga rau shaga di n lu yang, si nat ra la ai Asuya hpe si nat sha da da shaga sha ngun ra sai. An-hte Mung masha ni mung hkyu hpyi di, dang di, dang dep ai ram rau garum ra sai.

Shing n rai yang yawng kaw si di si jawng ma hkyem sai. DVB TV Program May 10th kaw yu yu yang grai myit machyi na zawn nga hkam sha nga n ngai. Dai majaw an-hte yawng hkrung nga ai Karai Kasang Wa kaw kyu hpyi ga ngu saw lajin let hpung dim dat n ngai law.